久遺嘅中伏分享系列，今次想分享好好好耐嘅小型吸塵機，佢可以不斷刷新我三觀，令我唔敢再買呢類產品住，可以講同上次嘅黑砂濾杯嘅心理陰影差唔多，用到勁激氣，喺正文開始之前，都係帶返個頭盔先，冇針對任何品牌/商家，純個人經驗分享，可能只係我好彩抽中「機神」ummmm，就係咁喇！正文開始！
中伏分享！不斷刷新我的認知暴風膠囊吸塵機！評測分享！
唔知大家對於一個「手提小型吸塵機」嘅慨念係點，對於我自己呢，無非係夠細拎得起、吸到塵/啡渣、電量正常、偶爾清塵、重點「希望減輕使用者日常生活清潔負擔」就好，唔知大家覺得，對於我以上要求一個「手提小型吸塵機」過唔過份，我自己喺買佢之前，我認為係普遍知識，我見人哋/網上嘅開箱介紹Video，大家都用得好開心，於是就咁樣，我就開始踏入我嘅中伏之旅...
一年使用體驗心得
買返嚟嘅原意，都係諗住間唔中清清Coffee Corner臺上嘅咖啡碎，或者係間唔中喺Espresso機上嘅塵/磨豆機上嘅細粉，因為有D位用掃仔去清潔，掃完都會喺張臺度，所以諗住搵個吸塵機仔去清會快好多，亦都唔需要嘥太多時間，或者要濕水用濕紙巾去吸佢哋上嚟，但點知....幻想總是美好的。咁返嚟後充完電，頭1、2次用，吸都係好正常，除咗機身偶爾有少少熱，同出風位有D怪（佢講嘅吹氣效果）其他都有理想中嘅效果，但當到第3次之後...嚟料了！
不能接受的遭糕體驗
機身吸唔夠10秒就熄機...初時我都以為係電量問題，諗住搵條速充電線去幫佢充啦，點知原來唔支援，咁我就搵返條2A以內嘅充電線（慢充）先充到佢，充完一晚之後，我第2朝一用，又唔夠10秒就熄機...搵咗好耐原因，結果係中間嘅垃圾區域滿咗，但等等先！肉眼睇，入面個區域吉㗎喎！得少量粉，OK，照倒倒試吓啦！又得返！後尾發現原因，佢入面個金屬濾網（官方話係過濾系統）原來因為金屬孔太細，所以一有粉狀嘅嘢就會自動塞住，當塞住後，佢就會感應吸唔到空氣後，就自動熄機...
之後就變咗，如果我吸咖啡碎，用1-2次，就要去垃圾桶去掃返金屬濾網D粉走...但當你以為掃完，下次開心用，YA！佢又冇電啦！用5分鐘，充我5個鐘....
OK，當以上問題解決，用嗰時你以為好舒服？錯了，佢下方個吸管，係勁易鬆，用嗰時吸吸下，唔小心郁到佢就會跌落嚟，結果你又要執返支嘢吸落去，咁又冇咗30秒吸咖啡碎嘅時間喇！而且吸管前方個掃，佢個掃原本可以條管向吸管方向拉後，令到吸嘴突出，可以吸力大D，但我用咗幾次後，佢就"卡"實咗了...
咁上面都係小問題，當你好熟個手勢，諗住今次去吸得啦！唔夠2分鐘，過熱...熄機！O....K...我忍！咁碎啫，我手腳快少少就冇問題！
但呢個時侯，物理學出現了，有吸空氣嘅地方，就必定會有噴空氣嘅地方，咁佢噴嘅位置喺邊？冇錯，就喺機身後面，如果你將個噴嘴向下，因為佢噴力都幾強，會噴走返你臺面嘅咖啡碎/塵...，咁...我吸咩....，我掉返轉個噴頭啦，佢向天噴都OK嘅...前題你屋企夠大，因為當你附近有雜物，佢就會將其他雜物上嘅塵，會噴到成屋都係....如果你沖咖啡嘅位置喺廚房，自己諗諗畫面，佢噴力仲係強嘅....（有冇得較力度？有，強/特強，可以2選1，仲有個加速mode，可以變特特強風力）變咁用嗰時我就要邊用邊就佢，除非你張臺附近冇嘢，否則都幾難搞。
當你處理好晒以上嘅問題，再想用嘅時侯，你會發現...佢又冇電喇！去沖電啦！結果就不斷循環返以上嘅事，頂，咁我拎把掃仔好過啦，用佢做咩啫！買返嚟後仲要服侍佢，CLS Product。
一年使用VSGO VS-VC01 V1 Pro 暴風膠囊手持式電動吸塵器總結
關於對佢嘅感受，就係咁喇，對住佢，我己經放棄咗，除咗個樣覺得幾好睇，個風力幾好外（不限於風力持續時間），如果作為吸塵機，一個咁麻煩嘅Product，到底邊LUN個設計，完！冇補充！
