咁话说搬咗新居后，一个新地方，点都要饮水，咁其实呢我搬之前，我旧居系用过滤水慨，即系会有好多唔同慨过滤器，喺厨房出水慨位置，加上楼龄比较旧少少，咁所以我会好注重呢方面，因为我真系唔希望饮都有金属物质或者大量杂质慨水，以前试过会好头晕，唔知有冇朋友一样？
咁我谂住搬新居，楼龄新啲，出水位置应该有改善啦，但对唔住呀，我估错咗，情况一样严峻，冇错要用到严峻呢个字。
当我搬新居后，第三至第四日，几经辛苦，终于拆箱，拆到个煲出嚟可以煲水，厨房打开个水龙头，啲水系透明清澈，咁我谂住煲完慨水应该冇咩金属物质，结果一饮，好金属呀！好充满金属风味呀！呢刻我就知道出咗事。如是者，冇理由唔饮水㗎嘛，咁我买新滤水器之前顶住先啰，之后前两日我拎嚟冲啡，好耶喎！咖啡应有慨风味完全唔见晒，当日夜晚我仲即刻发冷，超攰，有一刻，我以为中招！吓死我。瞓咗一晚之后，我谂紧可能未必关水源事慨…但我心入边已经系觉得冇100，都有90系渠。于是，我就即刻出街买个即热式慨滤水器先。
关于初步使用RO纯净饮水机的感受
老老实实，暂时用得几日，分享慨嘢有限，但我照讲先。
睇到呢度，我谂大家都会好关心过唔过滤到重金属、杂质，对于同以前冲啡有咩分别？我先讲前者。我觉得系过滤到部份慨，但我仲系会饮到好极度轻微慨金属杂质，因为渠始终得一支滤芯，虽然讲都有RO滤层（广告或者资料讲含有RO滤层慨滤芯，只可以俾水分子经过，但根据我呢几日饮慨经验，我觉得系过滤唔晒，因为我真系饮到有好轻微慨金属（我对水慨味道系好敏感））
同以前旧居慨过滤滤芯对比，虽然要煲水，但会好饮好多。 （旧居系传统五重滤芯，可直接饮用，但冇RO滤层），我谂如果屋企水喉唔太大量慨重金属，系可以使用，但唔好旨意渠会过滤晒，出嚟慨相会唔会好似讲过话会令到人好想饮水呢？暂时唔觉。
RO纯净饮水机的水质冲煮咖啡会更好喝吗？
至于冲煮咖啡。会唔会话咖啡更加好饮？
以下纯个人分享（因为都要睇你单位自来水慨水质，间间唔同，绝对唔系答案，纯个人分享）如果同普通煲过水喉水对比，个人觉得系会更加好饮，但如果同普通蒸馏水对比，我都系会拣RO水机，味道的确系好饮少少，但同矿泉水对比呢？绝对系矿泉水好饮好多，我会形容做风味冇咁杂乱，唔会太单薄。
但如果同我旧居5重过滤滤芯，绝对系过滤水好饮好多，基本上同矿泉水不相伯仲。不过我真系要再试清楚先可以讲，因为暂时时慨次数真系好少。
RO纯净饮水机的初步总结
简单啲讲，方便易用，家中多人作客系OK慨，不过冇广告咁夸张，另外琴日出story收集意见后，好多朋友话去到中期就会好易坏，会长时间滴水，拎去整要等一个月，不过当然都要睇手气慨，要买慨话记得加保养。同埋先安装普通过滤滤芯后，再交俾RO水机，我谂可能变化又会唔同，话唔定真系好饮好多，月尾试完后再分享，暂时观望中，有用过欢迎分享心得，集思广益。
