睇到呢度又可能有其他人會問，咁之前你試過嗰堆呢？唔記得喇咩？ um....硬要講呢，記得部份嘅...不過要我即刻講出口，我真係要諗諗，但如果uncle ben呢，一秒就講到，而且隱隱約約個口腔仲記得個風味，簡單啲講就好似食朱古力，你會知道朱古力係咩味道，而成個過程係已經去到唔需要諗嘅階段，佢帶俾我嘅感覺就係咁樣。
睇到呢度，我想分享吓我嘅體驗，如果關於佢風味等嘅資料，可以去返佢個網/睇睇其他人分享，內容會比我好好多。
入坑Uncle Ben Coffee風味
唔知大家平時會點樣去買咖啡豆？
先睇豆種、再睇產地、再睇roaster/品牌炒出嚟咩風味等等資料先？作為入坑就快一年嘅我嚟講，老老實實，我真正啡齡真係未夠一年，冇大家諗到咁專業，對於我自已，要我記產地、豆種、莊園出嚟嘅風味，有難度...對於入坑咗一段時間嘅我...有啲高，加上我記性唔太好，所以多數買豆，買完後除非試完真係好深刻，否則可能下次就轉第2間。 至於點為之深刻呢？最簡單講，就係鍾意佢出嚟嘅風味。
對於Uncle ben coffee，基本上有留意我Story嘅朋友就知道，先前無意中有一次喺長沙灣Contrast接觸過後，試咗佢哋整嘅手沖後好鐘意，之後因為咁樣衝咗去銅鑼灣嗰邊買，買完後返到去一試，好正！好鐘意！估唔到有呢種風味喎！
就係咁...每一日都會享受佢所帶嚟舌尖上嘅感覺，亦開始深深迷上呢個品牌，因為佢小有獨特風味令我記住入腦，成為我每朝/深宵嘅陪伴密友之一，而且因為佢，我都開始搵本地唔同roaster，睇睇會唔會有唔一樣嘅風格，真心冇諗過由本身每日/隔幾日飲一杯啡嘅我，慢慢到而家兩至三杯/日。不過飲咁多唔係提神，係鐘意，我鐘意飲啡，就係咁簡單。
入坑手沖後記
如果初嘗入坑手沖，有少少預算，買完基本手沖周邊後，可以試吓Uncle ben coffee，味道比文字描術更出色，建議你試試！會比想像中驚喜更多！
其實最尾真係有諗過好唔好咁寫出嚟，但諗返主題係咖啡豆分享，咁分享感受都係屬於分享內容嘅一部份，對於呢個牌子老老實實真係幾鍾意，入坑唔係好耐嘅我，對於本土嘅各大品牌或者Roasrer認識真心唔多，都係睇大家share我先知道。
我會唔會因為知道嗰個莊園，而選擇去買嗰類嘅咖啡豆？我諗應該未必，因為我連莊園嘅資料我都唔太清楚，對於大眾之一（即係我）入坑唔算好耐，有時去coffee shop買咖啡豆，好多時職員都會同我講呢款呢款喺邊度出嘅，呢款個處理法係點樣，其實我真係一知半解，而且我真係其實想知，但奈何有時真係聽唔明，所以決定買同唔買嘅因素，只係純粹因為佢嘅風味啱唔啱我。
對於咖啡嘅文化同資料，我諗我仲要用好長時間去學習。對於咖啡豆嘅選擇，會唔會第二次選擇去同一個舖頭買？我諗我暫時我會用風味去決定，而uncleben，我諗唔只會有第2、3、4，甚至5、6、7….直接我有一日飲厭為止。
最後唔知大家明唔明我後記所講嘅說話，不過就係好突然咁樣想分享。
PS：寫完後，我發現成篇只講好，有冇其他嘢呢？但對唔住，真係諗唔到...我想中肯/持平㗎，上面已經係.... 就係咁喇！完！
咖啡豆品牌： @uncle.ben.coffee
地址： 銅鑼灣新會道G102 G/F 6-10 Sun Wui Road京城大廈
營業時間： 12:00-18:00 (逢星期一休息）
