咁話說搬咗新居後，一個新地方，點都要飲水，咁其實呢我搬之前，我舊居係用過濾水嘅，即係會有好多唔同嘅過濾器，喺廚房出水嘅位置，加上樓齡比較舊少少，咁所以我會好注重呢方面，因為我真係唔希望飲都有金屬物質或者大量雜質嘅水，以前試過會好頭暈，唔知有冇朋友一樣？
咁我諗住搬新居，樓齡新啲，出水位置應該有改善啦，但對唔住呀，我估錯咗，情況一樣嚴峻，冇錯要用到嚴峻呢個字。
當我搬新居後，第三至第四日，幾經辛苦，終於拆箱，拆到個煲出嚟可以煲水，廚房打開個水龍頭，啲水係透明清澈，咁我諗住煲完嘅水應該冇咩金屬物質，結果一飲，好金屬呀！好充滿金屬風味呀！呢刻我就知道出咗事。如是者，冇理由唔飲水㗎嘛，咁我買新濾水器之前頂住先囉，之後前兩日我拎嚟沖啡，好耶喎！咖啡應有嘅風味完全唔見晒，當日夜晚我仲即刻發冷，超攰，有一刻，我以為中招！嚇死我。瞓咗一晚之後，我諗緊可能未必關水源事嘅…但我心入邊已經係覺得冇100，都有90係佢。於是，我就即刻出街買個即熱式嘅濾水器先。
關於初步使用RO純淨飲水機的感受
老老實實，暫時用得幾日，分享嘅嘢有限，但我照講先。
睇到呢度，我諗大家都會好關心過唔過濾到重金屬、雜質，對於同以前沖啡有咩分別？我先講前者。我覺得係過濾到部份嘅，但我仲係會飲到好極度輕微嘅金屬雜質，因為佢始終得一支濾芯，雖然講都有RO濾層（廣告或者資料講含有RO濾層嘅濾芯，只可以俾水分子經過，但根據我呢幾日飲嘅經驗，我覺得係過濾唔晒，因為我真係飲到有好輕微嘅金屬（我對水嘅味道係好敏感））
同以前舊居嘅過濾濾芯對比，雖然要煲水，但會好飲好多。（舊居係傳統五重濾芯，可直接飲用，但冇RO濾層），我諗如果屋企水喉唔太大量嘅重金屬，係可以使用，但唔好旨意佢會過濾晒，出嚟嘅相會唔會好似講過話會令到人好想飲水呢？暫時唔覺。
RO純淨飲水機的水質沖煮咖啡會更好喝嗎？
至於沖煮咖啡。會唔會話咖啡更加好飲？
以下純個人分享（因為都要睇你單位自來水嘅水質，間間唔同，絕對唔係答案，純個人分享）如果同普通煲過水喉水對比，個人覺得係會更加好飲，但如果同普通蒸餾水對比，我都係會揀RO水機，味道的確係好飲少少，但同礦泉水對比呢？絕對係礦泉水好飲好多，我會形容做風味冇咁雜亂，唔會太單薄。
但如果同我舊居5重過濾濾芯，絕對係過濾水好飲好多，基本上同礦泉水不相伯仲。不過我真係要再試清楚先可以講，因為暫時時嘅次數真係好少。
RO純淨飲水機的初步總結
簡單啲講，方便易用，家中多人作客係OK嘅，不過冇廣告咁誇張，另外琴日出story收集意見後，好多朋友話去到中期就會好易壞，會長時間滴水，拎去整要等一個月，不過當然都要睇手氣嘅，要買嘅話記得加保養。同埋先安裝普通過濾濾芯後，再交俾RO水機，我諗可能變化又會唔同，話唔定真係好飲好多，月尾試完後再分享，暫時觀望中，有用過歡迎分享心得，集思廣益。
