咁首先多謝Ikape espresso佢哋嘅邀請啦，如果有留意我Story或者IG Reels嘅朋友，都應該見過部份使用體驗，暫時用咗一至兩個星期，我諗住將呢兩個禮拜經驗分享一下。講明先，都係有嗰句講果句。好，正文開始！咁話說如果有留意開我IG嘅朋友，都知道我對於奶啡嘅體驗，不嬲都係麻麻地，咁當然最大主要原因係我好少沖奶啡，亦都唔識拉花，所以一直興趣都唔係好大。
咁至於鍾唔鍾意飲呢，我諗我會鍾意飲Black coffee多少少，我鍾意嗰一種嘅乾淨感，但你話咁我出街會唔會買奶啡飲呢？我係會嘅！
一套適合的濃縮咖啡工具很重要
咁所以當我第一時間收到品牌方嘅邀請，老實講，興趣冇手沖個類咁大，不過就一直都好想試吓成功拉花，先前試過買部份周邊配件返嚟試，但都係冇果一種感覺，用起上嚟睇落好似好方便，但實際冇大家想像咁方便。咁所以一直都好少出關於有奶啡嘅資訊，不過就係當收到呢個品牌方之後，又估你唔到喎，又真係大大增加左興趣（咁當然係佢齊配件，同埋嗰部份真係幾好用，性價比都接受到嘅）
一個性價比高的入場品牌
我諗深信好多人喺屋企想玩奶啡，除咗你有個空間之外，其實入場費用我都覺得幾高吓，唔計部意式咖啡機，你佈粉器、壓粉器、粉針、放配件嘢嘅箱等等，如果買有牌子，齊配件嘅，大大話話都幾千以上，我諗應該走唔甩。
咁所以初時我接觸奶啡嘅時候，我真係估唔到初次入場預算門檻的確係比較高少少，而且仲有事後嘅清洗，整奶啡嘅時間，我諗就算你買咗部機返嚟，可能你慢慢都唔會想用，加上唔熟手，整唔整到又係一個問題，我諗最後好多人都會寧願出去買奶啡，慳錢慳時間。
以上呢點係我接觸大部份朋友，最多同我講嘢嘅問題，而對於我自己都係一樣，齊配件洗一轉，咁就冇咗半個鐘啦！如果我要朝早起身返工嗰時整，我諗我會有啲卻步。所以一直都好想有啲好方便拎起就用嘅配件，重點易打理，我諗呢個牌子係做到呢步。
Ikape Espresso使用體驗
講明先，奶啡我真係好少玩，所以好多原理上我都唔會話太清楚，加上我係好懶去睇說明書或者大量技術教學嘅人，大部份嘅嘢買咗返嚟直接實戰，好用就好用，唔好用就唔好用。
我諗呢個Espresso嘅配件套裝，比我想人中越嚟越易用，其他配件冇話太大嘅特別，不過有一個我係好深刻嘅，第一係有個自適應重力佈粉器，堅係好用，佢唔需要壓嘅，佢係放落去嘅時候，因為佢個金屬好重，所以就係會因應粉塵嘅厚度，你俾一個好合適嘅重力佢，做到佈粉嘅效果，唔使再驚每一次力度太大或者太細，唔知點解就係啱啱好力度，呢個要讚。比起我先前嗰個好用太多。
一放落去轉幾個圈搞掂！
其他感覺就暫時都幾好用嘅，我諗之後用落一排再詳細分享，暫時因為佢我夜晚願意咗去玩多少少拉花。
希望今個月真係成功拉到，我諗我用多陣先再同大家分享詳細版本，完！
