好耐都冇同大家分享過咖啡周邊，今次想同大家分享嘅係咖啡用具「kruve咖啡聞香杯&手沖濾壺」，我諗呢套香港應該暫時比較少人用，而我自己當初埋佢嘅原因係「靚」，冇錯就係咁簡單。之後對我咖啡提升嘅體驗，俾我當初諗嘅超出都幾多吓。我原本真係expect佢一隻好靚嘅杯，咁就完咗件事，所謂嘅聞唔聞香，我真係純粹當佢係marketing術語，但事後我係錯咗嘅，轉頭解釋點解。
為什麼我會選擇購買Kruve 咖啡杯？
咁話說我一直對咖啡玻璃產品，其實冇乜抵抗力，除咗興趣收集一套外，只要個玻璃做工通透，而外觀靚嘅話，多數我都會不問品牌下直接入手。對於玻璃咖啡杯，深信多多少少大家都睇過唔少，咖啡市場上Fellow、Timemore、Kalita、Hario都會有唔少選擇，不過對於擁有強大產品生產線嘅佢哋，主都係圍繞濾壺、濾杯、或者係Espresso嘅杯，如果講到一隻150 mL以上嘅玻璃杯，睇中有想即買嘅感覺，外觀仲要冇咁「行貨」，我諗呢方面咖啡用具市面上的確係比較少。
所以我做research嘅時候，基於以上條件，真正靚嘅，我估10隻手指數得晒，咁所以當我發現呢個牌子嘅時候，果下我對眼係發光嘅，因為事前加埋佢嘅雙層玻璃做工，咁結果就即刻入咗手。
另外原本諗住睇吓網上有冇朋友分享有關產品專業知識/評價，結果都係得官網/部份網店有講，不過內容都係好少，所以買嗰時你話唔擔心個沖煮品質就假嘅。
Kruve EQ 咖啡聞香杯與手沖壺的使用體驗與原理，真的能有效提升整個手沖咖啡的品嚐體驗嗎？
入手之後，我諗對佢嘅感想係好壞參半，如果要用一句去表達我成個體驗，我諗會係呢句「聞香杯品嚐係好事，但手沖壺體驗係壞事」係一個比較爭少少就完美體驗嘅件事。
先講佢嘅聞香杯，佢個設計比較似紅酒杯個概念，主要都係透過杯口嘅直徑同高度，等咖啡嘅香氣分子集中啲，當你一去飲嘅時候，因為個杯口比較高身嘅關係，所以佢好容易罩住你個鼻，飲嘅時候你吸嘅空氣會係直接係聞香杯裝住咖啡散發出嚟嘅空氣，所以成個體驗對於咖啡迷其實係一個好大嘅提升，咁至於你話紅酒杯做唔做到呢個效果呢？我深信都可以嘅，不過要咁高嘅杯口直徑可能要香賓嗰啲杯先得。不過就拎住個酒杯去飲咖啡，我覺得真係有少少怪，而呢套就可以解決埋呢方面嘅問題。
佢另一個杯口比較闊少少，概念都係一樣嘅，如果問我自己，我比較鍾意高身直徑嗰款，我諗飲嘅感覺，如果真係要夾硬用一個數字去講佢提升幾多，我諗10% - 20%以上走唔甩，因為品嚐其實有部份係靠香氣去傳遞俾你大腦，所以多香氣集中對你飲嘅咖啡質素有冇提升呢？係真係會有影響。
咁你話普遍嘅咖啡杯做唔做到咁嘅體驗呢？我諗會比較難少少，始終受嗰個杯口直徑同高身設計限制。咁同埋手沖壺個原理其實都一樣，所以就唔多作介紹。
除了品嗜咖啡外，讓人意想不到的的手沖時使用體驗，產生讓人悅耳的聲音
另一個分享比較特別小小嘅主題，就係聲學，唔知大家平時沖煮咖啡嘅時候會唔會留意聲音，如果有留意嘅話，我想講一句佢嘅聲音係非常悅耳，基於佢嘅材質係玻璃，仲要係雙層，仲要係高身設計，所以當水流打落去個手沖壺/玻璃杯底部嘅時候，佢嘅聲音反彈返上嚟係一種通透、清脆、但係好實嘅感覺。
如果用一個現實嘅例子，去做一個幻想，佢就好似去咗一個好大嘅山洞入邊，而山洞入邊，有一道瀑布，水流沿着瀑布向湖底方向衝擊落去，嗰種水流嘅清澈聲音，就係佢會反應到，等你提升個咖啡感官，所以如果當你屋企冇人時候，不妨試吓熄晒全屋嘅聲音，你就會明白我講嘅係咩。
可能誇張，但事實就係咁，呢點值得一讚。
有關Kurve 咖啡聞香組合的外觀設計，讓人眼球煥然一新
相中睇嘅外觀/顏色其實同實物睇差唔多，外貌協會嚟講係超高水準嘅，雙層嘅設計，當佢內層玻璃充滿左咖啡，如果屋企有多少少光，你會見到玻璃折射光線後，個咖啡入面係會有一種少少發光，無論手沖壺同聞香杯，都會有一樣嘅效果，呢點好鍾意。
另外得益雙層玻璃設計，所以拎個時你唔會感覺好熱，可以好放心你一啲入邊裝咗好熱嘅嘢，睇得又實用聞香杯大讚！
最後佢個玻璃，我諗咁多款玻璃製品，佢都算係通透嘅一款，同埋佢會有一種少少透綠嘅效果，光線折射下會更加明顯，唔會係完全冇顏色。不過就外觀上面睇我覺得係一種加乘，唔會俾人感覺係一種好平價嘅玻璃質感。
美中不足，Kurve咖啡手沖壺半伏
咖啡聞香杯，我真心覺得係好好，有機會就入手，但至於手沖壺，可以買，但唔係必須，除咗有以上嘅優點之外，其實關於濾壺，我會非常注重一件事，就係倒落去杯嘅過程，入邊嘅液體會唔會倒瀉？最後搞到成張枱都係水，而我開始嘅時候真係百分百倒瀉，後尾再研究先知道倒水都要有技巧，呢部份我真係冇諗過。
容易倒瀉咖啡液體的設計，Kruve咖啡手沖壺
其實佢個倒水位，做得比較厚，而且佢嘅樽身都比較大，所以樽入邊有咖啡倒落去嘅話，你係好難睇到個倒水位點倒水，一個唔留神樽身倒水位，唔係對準杯身（直角對準地下90度），你就會中伏。
暫時喺其他咖啡濾壺，我係未試過呢個情況發生，咁當然都有可能係我問題，不過我就覺得呢點唔係太過方便，因為基本上我到而家用10次有5次都係要抹一抹返個樽身。
同埋永遠都有一兩滴流出來，呢段真係有啲失望，但其他體驗都係OK嘅。
小插曲 - Kruve咖啡聞香組合，開箱前的顧慮
分享一個細嘅小插曲，我諗對於大部份玻璃咖啡器具/產品，我買嘅時候會有一件時必定檢查咗個產品有冇問題先，因為我曾經試過Fellow個類嘅玻璃產品，喺香港運輸過程爆咗，事後搞咗一大輪，所以對於咖啡玻璃產品都會比較小心眼，香港盡量有現貨，就買現貨。
如果Kruve聞香杯如果要買嘅話，最好唔好揀網店買，因為玻璃比較薄身，如果要買最好現場去拎走，因為驚物流會運輸時Dum貨，或者落訂單時可以比多少少運費，叫網店商家包好晒先出貨就比較個品質上會安全啲。
Kurve EQ 咖啡聞香組合總結
我諗以上嘅分享就去到呢度，我個人建議如果你想買杯，不妨可以考慮吓，但你話呢手沖壺，如果你覺得以上倒瀉個條件唔係太大煩惱，我覺得都可以入手嘅，用嚟招呼朋友嗰時就小心啲就OK。
同埋最後唔記得講，因為手沖壺佢入邊個高度比較長，所以清潔嘅時候你係要搵啲高身清潔用具/水槍先洗到，如果唔係會有啲難搞，所以我自己都唔係成日用佢，就係咁，完！
